香港特區政府話明要搞六大產業，左丁山至今未能記得晒邊六樣，只係記得教育一定係六大產業之一。香港人辦教育，好有頭巾氣，既想搵錢，又唔想俾人批評為商業化，將來如何推動教育為一項產業，問題多多。譬如香港啲傳媒評論最鍾意左鬧右鬧，議員亦然，如果教育界唔郁，會遭受批評為缺乏動力，如果大力搞，會被評為向錢看，將教育視為商品。你話教育界點算好？
英國人、美國人就唔同，不須大鑼大鼓，就將教育變為產業，取錄大量外國學生，令本國中學大學賺咗好多外滙，以彌補公共教育經費之不足。美國唔少州份已將教育視為出口產品，艾奧華州有StudyIowa計劃，伊利諾州有StudyIllinois計劃，各州爭相推銷本州教育產業，以市場營銷手法推廣。英國呢，除咗招收大量國際學生之外，一流學校如陶傑筆下嘅哈羅，直情將哈羅呢塊招牌變成特許經營（franchise），做其所謂branding，在泰國、中國設校，現在又話在香港屯門設校，經營權由邱德根一位公子奪得。英國報章有冇批評哈羅發錢寒，將教育商業化、庸俗化呢？左丁山就未見過，即使有，哈羅都費事理會，搵銀要緊，此乃真正視教育為產業也。
陶傑嘅母校──華威大學亦努力輸出教育產品，與VTC（職業訓練局）合作辦一個碩士課程，MScinProgrammeandProjectManagement（項目管理碩士），今年九月開學，現仍接受報名。不過人哋有較高入學要求嘅，例如英文水平達到IELTS6.5級（相當於托福六百至六百二十分），及已擁有大學嘅二級榮譽學位。外國大學一般唔收二級榮譽以下嘅學生讀碩士，本地大學生宜注意及此，在大學唔好玩得太癲，攞唔到二級榮譽。唔好以為港大徐校長在中大畢業時只得三級榮譽，夠可以成為世界知名教授咯，於是有樣學樣，須知道徐校長係異數，千中無一。據講華威大學派教授來港執教，學生有興趣嘅，可以飛到英國華威大學校園修讀一兩個課程單元，十二個月（全職）就讀完。