新世界發展（017）董事總經理鄭家純私人有份投資嘅恒大地產，舊年初上市不成，最近蠢蠢欲動，打算捲土重來，新聞亦特別多，包括請到郎平擔任廣東恒大俱樂部女排主教練，以及近日以19.35億元人民幣投到兩幅石家莊地王等。不過，當中亦有負面新聞，早前有消息話合生創展（754）財務總監譚禮寧（圖）7月到恒大返工，做唔夠一個月就走咗，惹來市場無限猜測，唔知間公司係咪有衰嘢。
無阻上市籌備工作
但係聽講，其實恒大早喺舊年11月，已經喺奧園（3883）請來謝惠華擔任財務總監，負責財務安排；資本市場就由總裁夏海鈞負責。
夏總過去一年基本上中港兩邊走，忙到不可開交，早幾個月喺朋友介紹下，諗住請譚禮寧幫手做財務總監，謝惠華就做佢副手；點知一直未傾好細節，譚生自己已經另有打算，辭職去也，因此財務總監嘅重任又再落番喺謝生身上嘞，咁睇應該唔會影響恒大嘅上市籌備工作。