何守信（何B）早前在非洲拍特輯，因腳傷急送返港動手術，但康復進展緩慢，未如理想，手術翌日做物理治療時也令何B痛不欲生，一度要求暫停治療，不過據醫生吩咐若不多活動筋骨，會容易導致肌肉萎縮，何B惟有乖乖忍痛就範。
何守信在本月初遠赴非洲東部埃塞俄比亞，為無綫42周年台慶大型紀錄片《活著》拍攝外景，其間何B不慎扭傷右腳踝骨折，傷勢嚴重，需要即時返港動手術醫治，上周二返港後，何B便入院，翌日動手術，在骨折位鑲上鋼片及螺絲穩定位置。
嗌痛暫停物理治療
昨日是何B入住醫院的第7日，連日來其妻陳麗斯衣不解帶服侍左右，昨日她在電話中說：「有排都未出到院，冇咁快康復，佢家冇咁痛，好咗啲，不過都未係好理想，進展好慢，都郁唔到，佢要做物理治療，做完仲痛咗，佢仲係好攰，不過如果佢肯乖乖哋郁吓咪好啲，佢有時乖，有時唔乖。」陳麗斯又謂何B已不用再吃止痛藥。
何B接過電話時則聲如洪鐘地說：「做完手術到家先冇咁痛，呢兩日先有覺好瞓，之前係痛到冇乜點瞓，本來做完手術第二日就去做物理治療，可能傷口未好，所以做到好痛，我同醫生講要停幾日先，唔可以做住，因為做物理治療令到腳部血液運行，咁個傷口咪好痛囉。」今日他會再嘗試做物理治療，何B謂傷腳還未能落地，但醫生認為他要繼續保持運動，否則很容易變成肌肉萎縮，即使傷口不動，腳趾也要經常活動。
預計需三個月康復
至於傷口埋口情況，何B說：「今日醫生睇過，都未拆線住，過埋呢個星期先拆。」陳麗斯每日也在醫院服侍，何B也甜甜笑說：「係呀，佢日日陪住我。」他又表示起碼要3個月才完全康復。此外，《活著》監製鄧婉媚電話中表示，昨日探望過何B，精神不錯，痛楚已減少，連日來有不少親友去探望。
採訪：陳寶明
