新世界系內公司新創建（659）噚日宣佈，佢哋嘅行政總裁（CEO）兼執行董事陳錦靈，喺上星期六與世長辭。根據年報資料，陳總裁享年應該六十有八。查實今年2月底公司已發出通告，話陳總裁因健康理由而暫時休假，點知半年後就傳出噩耗。
追隨彤叔逾40載
聽講陳總裁不幸患上癌症，但就冇透露係乜嘢癌病。其實點都好，希望陳總裁安息。新創建發言人話，陳總裁嘅喪禮會由佢哋負責，所有執行董事（包括呢排好唔得閒、忙於挑戰立法會嘅純官鄭家純）會先成立一個治喪委員會，然後再傾喪禮細節。
陳總裁喺1965年已加入協興（即新世界旗下嘅建築公司），追隨彤叔鄭裕彤，極得彤叔器重；2003年頭開始負責睇住新創建至休假前，係真真正正新世界老臣子，家走先一步，有公司幫佢搞喪禮，都算係生榮死哀。
李華華
mailto:[email protected]