尼泊爾的節日本來就多，多到連當地人都搞混、都錯過。每年8至9月Bhadra節，兩個月裏幾乎日日是節日，有時半夜見人巡遊，才省起今天都是個大日子。不過沒所謂啦，今日唔記得，我明日想念起你，隨便諗個「紀念日」都可以約齊三五七十個好友來慶祝。邊似得我哋啲香港人，數朋友三五個都唔知有冇，約了還要放飛機！
記者、攝影：陳慧敏
鳴謝：尼泊爾旅遊局、UNICEF
清心寡肉嫁得好
在街上亂走，見一街女人都穿紅色衣裙，捧住一盤盤鮮花祭品周街走，一定有嘢！原來為孝敬廣大Shiva愛戴者，凡於7月15日至8月15日Shiva生日期間，到廟內拜Shiva的信眾，都可以娶得好老婆、嫁得好老公。其中為疏導人流，凡星期一都是女信徒拜拜日。女信眾只要穿上紅色長裙，帶備鮮花及祭品，可保佑未嫁者搵到個靚仔又錫自己的好老公，已為人妻的，則跟夫君打風都打唔甩。嘩！這何止是尼泊爾女人，簡直是全球女人的願望。
我也嗱嗱臨買了一盤跟住拜。小盤的祭品裏，有一雙蠟燭、小花、梳子、小鏡子、紅髮帶及一些扮珠寶的串珠套裝，好像小時候玩的玩具。廟地方小，排到入廟我只夠時間將手上所有東西丟到盤子裏去，就被陌生師奶塞我個頭入內藏石神像的小洞裏，再在額上點了個紅點，連個壇都未睇清楚就給逼出來了。廟裏不准穿鞋，這天我偏偏穿了波鞋襪子，只能踩着襪子在剛下完雨淋濕了的泥地上走，黏黏的感覺實在難受，但為了好老公，腳底的惡心感算甚麼？出來後蠟燭成雙地點亮，在廟前繞三圈，再用力敲廟內的大鐘叫Shiva認住我個嘜頭，禮成！
此時，第二個有幫手塞我個頭入去祝福的師奶來邀請我加入恨嫁工會，今晚一齊食齋。原來拜祭持續一個月，在這一個月的每個星期一，恨嫁的女士們都得禁食一天，直到太陽下山後才可吃一點齋菜填肚。
你望望隔籬一版，看我今天吃了甚麼？Shiva，咁我即是嫁唔嫁得出？
聖牛節街頭倒奶實錄
馬騮廟變P場
尼泊爾的廟有很多，而且廟的作用更多，除了拜神外，可以是細路玩樂的廣場，飛仔們練波的地方，或者情侶們拍拖的地方。
記得第一次來猴廟時遇上「神牛夢遊」，已經塞車的公路上，多了幾隻神牛，結果與三輪車、單車、電單車、小販車跟幾隻牛在路上塞了個幾鐘才到達猴廟。
可能因為無齋戒，黑仔運程持續，今次是……下大雨！那雨像倒水一樣的下，廟旁山腰的位置，突然有間古怪的餐廳，有侍應生托住電視咁大盤MoMo在服侍三四十個客人。原來這是一家人為慶祝小朋友考試及格而舉行的Picnic！這裏的Picnic不是帶幾塊麪包幾包零食那種，是成隻船咁大個煲、搬埋火爐、船槳咁大隻鑊鏟、就地起成個廚房，即場煮食包MoMo，將人家猴廟弄到似個餐廳似的規模，才叫Picnic！雖然語言不通，但見我滴着水跑來，大家開始給我毛巾、熱水，剛包好的MoMo和汽水暖身，指手畫腳嘻嘻哈哈地談天（其實都談不了甚麼），該齋戒的我當然不會拒絕人家的美意，拍不到馬騮，卻參加了一場猴廟盛宴。
原來，慶祝都不用左等右等等節日，學會巧立名目就好了，而且慶祝原因可以是阿仔默書90分，或者阿女生第一粒暗瘡，快樂真的很簡單。
倒奶冲喜飽死
GaiJatra聖牛節本是個憂傷的節日，因為來巡遊的，全是過去一年死了親人長輩的小朋友及家人。然而傷心的一年過去了，本性開心的尼泊爾人最憎愁眉苦臉，於是要扮鬼扮馬引大家笑，借啲意玩一場。路人同時會送上禮物作為祝福。
銀紙、餅乾、糖果、紙包飲品，好狼的師奶們一早就帶同食物站在街角，一見小朋友來就快狠準將食物塞入紅白藍袋。我混在人潮中寸步難移，小朋友由剛開始見到滿袋食物很興奮，到後來見到派糖的人都謝晒表情。排在我後面的師奶手法更狼，她將茶煲裝滿奶，成個煲拿去會場，見小朋友就拖他過來，朝着對方的臉夾硬倒過去！噢!好多小朋友由朝早8時到12時已經行到累了，又食到滿肚子飽飽的，個個面目呆滯，同時間，夾在人潮中不能動彈的我亦感受到其他師奶的手在我腰間伸來伸去塞禮物！救命呀！
下周尼泊爾
加德滿都
間中有雨，24-32℃
