賭巴甲波，上季易、今季難。去年長追高士路、聖保羅、甘美奧或彭美拉斯等勁旅主W，各隊勝率俱逾70%，扣埋水位都有肉食。今年？實在沒有焦點球隊可放心重槌。
眼看周日重點推介的明尼路，寫稿時明明受讓哥連泰斯平/半，臨場突然受讓半球；我諗好多賭仔同畢傑一樣，自己左度右度的心水場次，賽前突受盤口大幅轉變，硬係影響信心。講真，全日近百場波，唔賭呢場使死麼？懶理鬼盤與否統統忍手，結果哥軍勝2:0。
「鬼盤」一詞好虛無
其實「鬼盤」一詞好虛無，你愛點講就點講。臨場回飛開對家，就叫鬼？難道波友未遇過臨場回飛卻開到正嗎？這又叫鬼？周日挾5連勝作客榜尾利斯菲體育會的聖保羅，盤口僅少讓平/半兼不斷回飛，贏2:1又怎解釋？總之，賭仔總喜歡馬後炮。
我不敢批死巴甲冇打假波，前年親身到馬拉簡拿球場，現場睇法林明高對彭美拉斯這大戰，豈料原本坐逾10萬人的球場，竟只得四千多人。門票收入少，變相球會收入縮皮，莊家會否看準這機會出手？沒人會知。我舉個例，今季巴甲開季短短4個月，竟已出現51個12碼，球證執法手段……大家又有否留意紐迪高前鋒基爾馬施華，幾乎所有入球也是12碼來的。假波從來都是信則有，不信則無。
文：畢傑
本報名家
電郵：[email protected]
逢周二、五見報