雖然係以歷史新高嘅白票兼冇人挑戰下當選澳門新特首，崔世安總算成為澳門揸fit人，為崔家光宗耀祖。發迹後還鄉祭祖係唔少政界名人指定動作，崔世安點會漏招？噚日佢就同屋企人大鑼大鼓咁返到江門市新會區雙水鎮崔嘉亨村祭祖，感謝列祖列宗庇佑。唔知佢有冇趁機幫埋一注獨贏買自己跑出嘅賭王何鴻燊祈福，保佑呢位伯樂早日康復，繼續射住自己？
幾百村民夾道歡迎
貴人駕到，崔嘉亨村村民當然高度重視，噚日安哥同太座霍慧芬以及十幾名親友朝早10點到達崔嘉亨村時，就有幾百名村民打鑼打鼓夾道歡迎，連同周圍嘅彩旗，排場十足。據聞村民更加喺安哥到達前一日清洗太平地，免得唔衞生情景失禮大人物。
唔好以為祭祖係一項簡單嘅活動，好似安哥咁，《廣州日報》原本預告，行年52嘅崔世安祭祖之餘仲會筵開52席，點知噚日鄉親反應熱烈，結果要多加幾圍先夠。安哥又向村裏面嘅老人家同細路仔派利是同朱古力，答謝鄉紳支持。
據村長崔松茂透露，以崔德祺（崔世安叔父）為首嘅澳門崔氏後人，喺50年代開始回鄉祭祖，崔世安喺80年代隨同返鄉。崔德祺每次返鄉祭祖都會向每戶村民派利是；崔世安其後更加碼，60歲以上嘅長者人人有份，難怪咁得村民歡心。
村民亦都唔係食完就拍拍籮柚走人，據知佢哋都自費送咗本崔世安當選澳門特首慶祝會嘅攝影集畀安哥做紀念品，算係禮尚往來。
南宋清廉名將之後
據宗親透露，崔嘉亨村嘅崔氏後人全部都係南宋抗金名將崔與之嘅後人；崔世安當選特首後，更有唔少外省人慕名而來，令崔嘉亨村都「村憑安貴」。
八方翻查資料，發現崔與之除咗詞章造詣極高，被尊為「粵詞之祖」之外，原來為官數十年嚟都以「無以財貨殺子孫，無以政事殺民，無以學術殺天下後世」自警，做到一生人不置產、不蓄妓同不收贈禮，好明顯係個肅貪倡廉嘅好官。唔知道不時被外界質疑官商勾結嘅崔世安，會唔會都以祖先崔與之為好榜樣？
mailto:[email protected]