《信報》專欄作家曹仁超自創嘅港式普通話熱爆YouTube，好多人都估唔到佢嘅普通話同財經分析一樣咁獨到。好多人唔明點解身為上海人嘅曹仁超煲冬瓜咁唔掂？曹Sir噚日喺港台節目《舊日的足跡》自揭謎底，佢話6歲之前都識上海話，但嚟到香港讀書就因為鄉音俾老師鬧，因此好努力咁搣甩上海話，點估到50幾年後要用番普通話接受訪問？
曹仁超都知道佢嗰段普通話訪問成為全城熱話，因為有讀者畀佢睇，自覺成件事「幾好玩」。佢話接受內地傳媒訪問前已經同個記者講明唔識講普通話，但對方話會配番字幕，所以即管一試，結果證明自己普通話確實「好唔得」，最離奇係啲內地人又話聽得明，唔知係咪因為佢哋其實係識廣東話？
每星期學兩堂
雖然成60歲人，但曹Sir都的起心肝學普通話，兩個月前開始每星期兩堂，每堂兩粒鐘。佢仲喺節目中露兩嘴，用普通話講話好有信心下年可以出席港台普通話台嘅節目，相信屆時應該「可以的」。主持人車淑梅一邊聽一邊笑，大家估唔估到曹仁超嘅普通話有冇進步？