香港經濟走出衰退，美國7月份失業率亦意外回落，金融海嘯夢魘似乎正逐漸遠離，但各國政府為挽救經濟，不斷印銀紙，上個禮拜長和系公佈業績，首富李嘉誠亦提到，擔心通脹遲早會嚟。
通脹殺埋身，首富話已有方法抗通脹，但唔話畀你同我聽。其實超人揸住赫斯基能源公司，通脹重臨油價勢升，佢亦自然賺多咗。不過超人一早為日後可能出現嘅經濟變化，諗定應付方法，難怪人哋係首富，呢樣嘢大家真係要學吓。
睇《華爾街日報》一篇專欄文章，提到喺通脹同通縮情況下，應該點投資部署。由於無論通脹定通縮，都係預計，篇文章每一個建議都係「兩手準備」，為一旦估錯做足風險管理。
喺通脹期，資產價格會升，尤其油價、金屬價、糧食價格，仲有就係黃金都會升，所以文章建議投資商品期貨。兩手準備係，買定通常通縮時價格會升嘅國債，以防估錯市。對於嗜炒嘅香港股民，隨住油價、金屬價上升，敏妮相信佢哋只有興趣短炒相關股份。
通脹掛鈎債券基金有賣點
其實喺金融市場，除咗炒股炒油同炒金，仲有唔少投資工具適合通脹時期投資，好似舊年就有金融機構喺香港推出通脹掛鈎債券基金，主要投資喺通脹掛鈎債券，賣點係通脹越高，派息越多。類似嘅投資產品喺外國早已出現，債王格羅斯旗下太平洋資產管理（PIMCO）早喺今年3月，已經估救市措施會令通脹加快重臨，建議趁通脹重臨前購入通脹掛鈎債券。
如果預計嚟緊通脹上升，呢類產品應該有賣點，喺踏入通脹周期初期買，會比確認通脹重臨先入市化算，因為呢類產品嘅特點係，高通脹時有可觀回報，但當通脹回落就會直接影響投資回報。另外一個要注意嘅地方係，呢類基金買賣成本唔低。相信亦都係呢個原因，令到香港散戶唔係咁熱衷，始終喺香港炒股直接快捷成本低。
溫敏妮
http://wanmanli.com/blogs/