財爺鬍鬚曾嘅辦公室今年暑假好有活力，因為三位來自中大、港大同劍橋嘅大學生入咗財爺辦公室做實習，拉低辦公室嘅平均年齡水平。鬍鬚曾喺網誌話，呢三位實習生除咗處理文書工作，仲親身去過立法會觀察拉票同游說嘅過程，亦陪過佢出席一啲公開場合，聽落好似多嘢做過唔少政治助理。
最鍾意宴請年輕人嘅鬍鬚曾自然有請呢三位實習生去官邸作客。佢話席間大家對電影、音樂同社會政策無所不談，鬍鬚曾仲有一大發現，就係呢幾位年輕人唔單止諗法不拘一格，而且唔係無的放矢，覺得香港好有希望。其實六四集會同7.1遊行都有咁多年輕人參加，已經引證年輕人不容小覷，鬍鬚曾毋須大驚小怪吖。