台灣風災殺人，成條村冇活口，八方睇新聞見到災民苦況都眼濕濕。民建聯主席譚耀宗去完珠三角考察，噚日同埋葉國謙及多個黨員，到銅鑼灣行人專用區擺檔為台灣災民籌款，佢哋揀正喺銅鑼灣SOGO對出個「黃金三角」靚位開檔，以為好醒目擺正人流最旺好位，點知人同此心，民記慢一步。
葉國謙一到場就發現呢個靚位已經俾人佔據，行人路掛滿「天滅中共，天祐中華」橫額，佢心知不妙衝口而出講咗句：「佢哋掛呢啲嚟做乜？」八個大字寫得好清楚啦，阿謙你唔係唔明嘛！雖然對啲橫額睇唔順眼，不過阿謙唔使自己操勞，八方見佢一邊行入附近商場門口嘆冷氣，一邊打電話叫人call警察嚟清場。
雖則執政黨落柯打，不過幾名警察慢條斯理半粒鐘後至到場，而且睇完一輪就收隊，並冇清場，最後民建聯死死哋氣要自己行開啲，更要冒險喺個棚架下面開檔，民記一班青年成員就擒高擒低掛起大大幅「賑濟兩岸災民籌款」橫額，八方睇見都戥佢哋牙煙。