海關為咗同緝毒犬影相宣傳掃毒工作，竟然召集全數45隻緝毒犬陪長官影相，令各邊防口岸頓時冇狗用，掃毒工作幾乎陷入真空狀態。助理關長譚耀強噚日公開辯駁，話咁做唔係失職，亦否認有人濫權「公狗私用」，反而話係想市民知道海關真係有45隻狗緝毒，為顯示海關絕對冇「裝假狗」，部門一於將45隻緝毒精英晒你冷，毒販見到，真係問你怕未！
警隊係咪要晒槍？
影張大合照就可以阻嚇毒販，如此謬論都講得出口，學似網友話齋，真係要派多幾粒膠畀譚Sir，就算你真係咁諗，都唔好咁naive講出口啦。根據海關toosimple嘅邏輯思維，如果有人質疑警隊有冇幾萬支槍對付不法分子，或者對金管局係咪真係有過萬億儲備對抗金融海嘯表示懷疑，一哥鄧竟成同任總，咪要擺晒啲軍火，或者開金庫拎晒啲cash出嚟畀市民過目！
其實八方一直思疑高官係咪真係有足夠智商治港，各位高官，幾十隻緝毒犬已經擺出服務市民姿態，都係時候輪到各位顯示智慧，有就拎出嚟畀市民睇吓啦。