「錢錢錢錢……成日要錢多……」由細聽到大，歌神呢首歌仲係咁耳熟能詳，不過喺五十年代嘅香港地，就幾乎搞到社會大動盪！講緊嘅係最新DVD《金錢帝國》，王晶執導加埋幕前大卡士唔在講，限量版更附送印有主角造型嘅磨光鉻防風打火機，集齊四款一套。咦！點解唔見碟面上嘅Eason嘅？
記者：陳國輝
故事背景
五十至七十年代嘅香港，鑑於警隊貪污成風，罪案率高，畀過路錢、保護費……名目眾多，勁過黑社會，簡直係無法無天！當時華人總探長Lak哥（梁家輝飾）以錢嚟隻手遮天，唔單止賄賂下屬，連紅鬚綠眼嘅英國駐港總司令，亦成為佢掌上一隻棋子！據粗略統計，當時用於賄賂嘅金額，以現值計算就多達5,000億港元！
錢可以指鹿為馬
由王晶執導，好自然會諗到究竟套戲係咪喜劇，好多笑料嗰隻？晶哥Fans可能失望，事關《金》幾乎冇笑位，可謂一套徹徹底底反映當年實況嘅電影！
不過好多人又懷疑佢同《五億探長雷洛傳》內容接近，搞到毫無新意；老實講，如果你想知錢嘅威力有幾大，《金》會話你知，例如可偽造破案率上升假象、有人自願幫你食晒啲死貓，甚至自己老婆都可以送畀人，上埋床都唔理！比起《五》片，《金》相對冇乜開槍鏡頭，連流血都唔多，劇情主要由三位主角掌舵！每一段故事各有味道，例如Lak哥以為有錢可以當皇帝，惡到想賄賂英國政府；又如陳細九（陳奕迅飾）雖然身兼探長一職，有錢兼有九個老婆，但每日卻活得沒有自尊；又如火麒麟（黃秋生飾）成世人等上位，可惜大佬一直睇佢唔起，仲要終日靠賭、靠嫖維生！睇完或許會諗：「做人係咪需要有啲尊嚴？錢係咪可以讓人指鹿為馬？
Eason火機變保怡
《金》片只係推出咗VCD同埋DVD，暫未有計劃推出Blu-ray，如果想睇全高清靚畫面，咁就要再等吓；不過為滿足碟迷需要，發行商特別加推火機版DVD，只限量1,000套！顧名思義，除咗包裝盒長啲，入面仲附送一個打火機，並印上梁家輝、黃秋生、方力申同埋林保怡嘅造型，但基於肖像權問題，4名主角當中獨欠Eason，因此由林保怡頂上；發行商仲話，稍後會加印另一位角色，究竟係王晶抑或劉洋？大家估吓喇！
睇刪剪偷情片段
除咗有火機送，當然普通DVD版亦收錄咗其他部份內容。好似約兩分鐘嘅預告片、TVC、製作花絮以及晶哥訪問片段以外，仲有幾段刪剪劇情畀你欣賞，例如有一段就講火麒麟捉姦在床，雖然每一段得分零兩分鐘，唔係好長，但內容總算搞鬼，至於畫質簡直粗到爆晒格，仲差過睇VCD，不過當Bonus片咁睇又幾過癮嘅！
Profile
片長：113分鐘
字幕：繁、簡體、英文
語言：國語
特別收錄：預告片、製作特輯、刪剪片段
