煲呔下令打抗毒戰，高官未做實事，先聽心戰室指示打輿論戰。多個局長聽日起輪流上電視為驗毒計劃解畫，禁毒專員黃碧兒噚日則出席官府電台節目，不過卻冇接受商業電台訪問，專員並非大細超，而係佢送到上門都俾人嫌棄。
May姐質疑抗毒做騷
商台節目《政經星期六》噚日訪問海關助理關長譚耀強講掃毒工作，主持人之一、商台新聞部話事人陳淑薇May姐一開咪就質疑政府抗毒做門面工夫，「係咪有姿勢、冇實際，大搞宣傳，未落實工作呢？」另一主持人蔡文堅就做慢打鑼角色，話家煲呔有最高指示，下面班官員惟有做啲嘢囉，兩人唱雙簧公然挖苦高官，事出有因。
據講個幾兩個月前商台已經聯絡禁毒處，邀請禁毒專員黃碧兒上電台講校園毒禍，不過當時黃碧兒十分矜持，竟然向May姐說不；點知事隔冇耐，官府卻突然自動獻身，主動話黃碧兒有啲嘢想同聽眾交流吓，May姐不甘做鍾無艷，回敬杰撻撻閉門羮。佢噚日講起呢單嘢都好鬼㷫，「我哋請咗（禁毒專員）兩個月，都話冇嘢好講！」
May姐講得㷫起，即場模仿黃碧兒撈陰聲細氣語調，「你（商台）有冇時間畀我哋講嘢？」May姐話唔志在，「我話冇，因為（之前邀請）你都唔講，家特首講咗嘢，唔使你講！」就係咁，黃碧兒冇機會喺商台開咪，不過市民應該冇乜損失，事關高官去到邊都係講廢話。事實上黃碧兒同教育局副局長陳維安噚日喺官台講嚟講去都係三幅被，媲美人肉錄音機林D9。
應幫香港記者出頭
講開又講，May姐話晒有個銅紫荊，官員喺佢面前扮大鼻無疑係找死，May姐今次咁英，幫成日受官僚閒氣嘅行家出番啖氣，最好快啲聯同新聞行政人員協會，約見中聯辦、港澳辦，交涉now新聞台記者喺成都被屈藏毒、干預採訪事件，要求中方畀個說法，還香港記者一個清白，先至真正大快人心！順便一提，下個月浸大會頒個院士銜畀May姐呢位傑出校友，恭喜晒。
mailto:[email protected]