東方表行（398）得單位數PE，嚟自祖國龐大嘅高消費潛力，長做長有，現價抵搞。東方表行09年度（3月底止）純利倒退咗35%到1億銀，喺上年下半年到今年第一季，金融海嘯吹到澎澎聲，集團純利仲keep到上億，已經有交代。再講，東方表行往績PE得6倍，又當2010年度嘅純利，亦只係維持到09年度水位，預期PE仲係處於偏低單位數。
又咪忘記，集團近年嚟積極拓展祖國業務，上年度，嚟自祖國及澳門嘅消售額，已經上到8億銀。中線睇，祖國高消費市場潛力龐大，東方表行分一杯羮仔，已經可以長做長有。家陣能夠以單位數PE，去買ChinaPlay嘅企業，少之又少，東方表行現價仲唔抵買？以上邊2010年度保守性純利預測做準，東方表行預期PE係咁意上番到10倍水位，現價（1.92元）講緊要升60%，到3蚊樓上。
麗展折讓大夠吸引
麗新發展（488）最新NAV0.49元，現價（0.133元）折讓高達73%，集團最新淨負債比率唔過10%，二三線磚頭股當中，麗展折讓及財政狀況，靚仔到痹。又麗展家陣揸住中環前麗嘉酒店重建項目，應佔11.25萬平方呎。中環旺地寸金尺土，齋計呢個項目完成重建後，已經可以為麗展帶嚟好豐厚增值，麗展NAV折讓肯定唔止73%呢個水位。呢轉短打，博麗展升20%到0.16元，集團NAV折讓仍然高達66%，實情仍然好吸引。
錢雋