識飲識食識享受嘅Michael（林澄光），人人叫佢做「少年食神」，憑住新奇又好味嘅飲食推介成為新一代嘅「搵食明燈」。原來好食嘴刁嘅Michael對住男人至愛嘅車都態度一樣，無論質同量都好有要求，巔峯時期試過擁有60幾架珍藏。數到至愛，原來佢唔貪「新鮮」，始終鍾情老爺車。今日見佢同Benz190SL及280SEL一齊到場嗰刻，真係忍不住大叫：「真識揀！」
記者：許維雅
攝影：陳陶鈞
鳴謝：EricSo、東利汽車維修
獨特有個性
久聞少年食神Michael係車癡，但要約到忙個不停嘅佢出嚟做訪問都係一件艱辛嘅事，往往身在異地打理生意兼搵食出書，訪問過程電話響不停，解答各方大大小小嘅問題，呢位大忙人卻偏偏對需要特別多時間照顧嘅老爺車愛不釋手，「以前嘅車無論外形、線條、顏色同造型都好有個性，每一個款都感覺獨特，相比起來，新一代車設計造型會容易近似。鍾意老爺車更加係一種情意結，家可以擁有番以前細個喺街度見到嘅車，真係好有滿足感好開心，感覺就好似食滷水鵝咁，嗰煲陳年滷水要滾得耐先好味，仲越食越有味。」
家約有40幾架珍藏嘅Michael，分別揀選咗架1957年嘅平治190SL及1971年嘅平治280SEL3.5出嚟見大家，呢兩隻「滷水鵝」果然係人見到都話有味道，「架190SL係我喺拍賣行用二百萬投返嚟，經典在佢嘅革命性，係平治SClass嘅始祖。而架280SEL係我當年細個時屋企曾經擁有，所以到自己有能力，就好想買番一架。後來有個老朋友讓畀我，我應承佢會好好照顧架車，佢知我有心錫車先割愛，老人家到家都周不時會打嚟問候吓架車，我就會載佢遊吓車河等佢同架車敍舊。
71年平治280SEL3.5 市值約：40-60萬
1.蝴蝶軚盤嘅幼鐵圈係響按掣，加埋桃木中控台，坐入車廂嘅感覺好似入咗時光隧道。
2.雞翼窗要手動打開，每個部份嘅陳年設計都令Michael着迷。
3.車尾線條扁而方正，個性鮮明，一睇就知歷史悠久。
4.四方形鬼面罩加平治標記，當年典型高級豪華房車設計。
5.好多古董車迷都鍾情呢對日字車頭燈。
6.揸呢部車去入油玩死啲阿姐，因為油缸口好鬼祟，收埋喺車牌後面。
7.打開車頭蓋一睇，一大把風扇吹住引擎散熱，「好新奇」。
修足3年閒閒哋
所以雖然話老爺車需要有升值能力，但鍾意老爺車嗰班人，好多都係講心唔講錢，成班聚埋一齊欣賞吓對方嘅車，講吓老爺車經已經好開心。」由於經常要到外地工作，接觸老爺車嘅機會更多，加上熟讀拍賣行資料，令好多朋友相信佢嘅眼光，多年前已經成日幫朋友訂老爺車返香港，00年時佢更索性做代理，引入喺日本專賣復古車嘅光岡，可惜06年損手離場。
「我又唔覺得係咩大不了嘅事，只係發覺原來將興趣變成生意都唔係一件易事。尤其香港係養老爺車特別難嘅地方，牌費貴、地方細、租金貴，加上天氣潮濕令舊車容易生銹，所以我哋平日保養都要好小心。」大家都知老爺車要保養得好係花時間花心機嘅事，對於每件零件都要求原裝先夠原汁原味嘅Michael而言，花費更不菲，「你有時買架老爺車返嚟，好似買咗一箸菜咁，閒閒哋要用2、30萬元去維修，更要畀時間，仲要有好師傅肯幫你慢慢執番靚仔。我有架木嘅Benz就用咗我3年時間去整，不過3年一啲都唔算耐，我堂哥有架用咗10年。」可能有人認為佢買車當玩具，唔會好認真，但其實佢對每架愛車嘅緊張程度都會如看待老婆般，唔捨得曬唔捨得淋，有時坐都唔捨得，更會千辛萬苦走去泰國地攤搵零件，「好多原裝零件都好難搵，我會成日睇英國雜誌ClassicCar，上面登好多專賣老爺車零件嘅網址，上網有得訂就方便好多。同埋每次去曼谷都一定會去LatPhrao，逢星期六先開嘅地攤有好多舊零件賣。」呢種佢視為樂趣嘅玩意，你有錢會唔會肯去花心機做先？
57年平治190SL 市值約：80-100萬
8.細至門邊把手同窗門開關都精緻過人，Michael千辛萬苦搵原裝配件果然執着得有理。
9.第一次見車廂入面嘅倒後鏡係裝喺中控台上方。
10.錶板係最基本嘅黑底白字設計，美觀程度比起新車嘅發光錶板都絕唔遜色。
11.連車匙都係原裝版本，鐵牌上刻有呢架車嘅資料。
12.Michael話，靚嘅老爺車好難搵，香港勝在容易入口，呢部190SL都係由英國運返嚟。
13.極扁身嘅車尾加電鍍Bumper，有型又有味道。
14.支波棍仔幼到不得了，Michael揸起上嚟都有難度，唔係咁易入後波。
