本欄於八月十日講及峨嵋派，讀者Julia來電郵指出：「峨嵋山是佛教的道場，著名的四大菩薩之一的普賢菩薩就是在峨嵋山得道的，很多旅遊人士上峨嵋山頂就是要看佛光，絕非道教場地」。
武俠小說之中嘅峨嵋派高手，往往係道士，我哋睇小說睇得多，便產生一個印象，峨嵋山有道觀。讀者Julia咁講法，左丁山自己未去過峨嵋山，於是上網查資料，有一個中國旅遊網，開宗名義就話：「峨嵋山道教文化」，講明峨嵋山是我國一座著名道教名山，引《魏書》：「道家之源，出於老子，授軒轅於峨嵋，教帝嚳於牧德」，此文長篇細說峨嵋山之道教古蹟，不提及佛教、佛光噃。但再上百度網搜查，峨嵋山一條就全部講佛教文化，係中國四大佛教名山之一，其他三個就係山西五台山，浙江普陀山，安徽九華山！
再睇真啲，百度網話：「相傳東漢時，山上已有道教宮觀，西元一世紀（東漢初期）佛教傳入峨嵋山，漢末佛家在此建立寺廟，普賢菩薩在山上講經顯靈。」之後全山由道改佛……
中國歷史名山，每多豐富故事，看來峨嵋山先道後佛，既有太上老君（天真皇人）神話、道教神仙洞，又有佛寺數十處，無怪武俠小說作家寫峨嵋山可以海闊天空，佛道並存。
一位讀者鄧小姐回應「開學五大難」（八月十三日）一文，指人人掛住講三三四學制，但忘記了最後一屆中五生（即今年九月讀中五嘅學生），如果會考成績唔好，佢哋喺二○一○年八月放榜之後，有何去處，是否可重讀？呢樣問題，其實可以請學校老師回答，佢哋冇理由唔知嘅啫，所有學校對此應該有更好答案，否則就係不盡責任。左丁山個人意見就係明年考會考如成績不佳，難升中六預科，重讀中五不切實際，因課程完全唔同也，倒不如報讀一啲高級文憑課程、副學士先修班之類，每逢學制改變，無論在甚麼時候，總有尾班車學生受到影響，啱啱碰上嘅，都唔知係夠運還是唔好彩！