富豪開口話家陣「唔買」股票、想買都要「小心謹慎」之後，又輪到政府趁公佈第二季經濟數據之際，出到聲話要留意資產泡沫！報告數據，如實交代咪算咯，為乜政府要刻意咁講呢？係咪有啲嘢係政府知，散戶唔知？值得留意。大市雖仍企在20800水平，但為安全計，有懷疑就持現金，建議散戶盡量伺機減磅。
招商銀行（3968）宣佈每10股供2股，向A股及H股股東籌集150億至180億元人民幣。以招行級數在散戶心中有一定份量，唔少散戶視呢單消息為大市利淡藉口，但以昨日表現判斷，似乎招行集資未對股市構成大跌壓力之餘，招行仲升3.3%，收報18.32元。
中國人壽（2628）在散戶心中份量一樣極重，惜國壽本月初升至35.50元後，表現就未見寸進，而且受保費連跌5個月影響，股價昨逆市下跌1.6%，收報33.60元，並已失守10日線及20日線，後市若未能成功重越其上兼企穩，形態將轉趨偏淡，料要跌至50日線（31.25元）水平才見較強支持，到時先買，贏面應較高。
國壽今年首7個月未經審計的保費收入為1911億元人民幣，較去年同期跌5.86%，問題係跌幅有逐個月擴闊之勢，此情況一日未扭轉，高追買貨有捱價風險，建議靜待靚位才入市。
方星俠