上屆燈神
人到中年，覺得自己越嚟越似宅男，近年放工、放假多留喺屋企，除咗睇波外就煲劇；日劇、台劇係小弟近期至愛，不過一套《絕代商驕》，令小弟重拾本地劇集興趣。
男主角做開棟篤笑，原本喺電視唔可以同觀眾有即時回應，感覺打了點折扣，不過搞笑功力仍然高王老虎幾班；一眾綠葉亦恰到好處，方中sir一句「等價交換」，就令人會心微笑。而且此劇有別於其他只搞三角戀、四角戀、爭身家嘅老土劇，起碼可以學到唔少經濟理念。
講開經濟效益，阿仙奴由雲格領軍，季季都有錢賺，轉會市場亦擅高賣低買；季前高價出售艾迪巴約同高路托尼，暫時只收購華美倫，係就係有錢賺，但面對激烈競爭，連續4季食白果，面對積極擴軍嘅阿士東維拉同曼城，要保前4絕對比上季難。
兵工廠防中問題未解決，首仗就要作客硬淨嘅愛華頓，個人覺得讓唔起平/半。
牽牛
近5場往績：W////
讓球：愛華頓（下）
心得：阿仙奴新季惡唔起