寶蓮寺住持釋智慧舊年中風入院，之後深居簡出好少公開露面，迪士尼樂園噚日送咗30幾棵樹畀寶蓮寺搞綠化，包括巴西大花茄同大葉櫻桃，貴客到臨，智慧法師篤住枴杖現身向樂園高層道謝。八方問候智慧法師，佢精神看來不俗，但坦言家講嘢冇以前咁精靈，又指吓自己個頭，似乎暗示腦筋轉數無復往日。
智慧法師提出退休
智慧法師大病後向寶蓮寺董事會提出退休，但由於禪寺擴建如火如荼，策劃、籌款冇佢唔得，佢應承留任三年，至於由誰接棒，據知出現類似下任特首跑馬仔局面，兩大熱門都係寶蓮寺首座和尚，分別係宏通法師同健釗法師。
宏通噚日代表智慧法師主持植樹儀式，由於釋智慧已半退休，所以日常寺務多交宏通打理，近年佢亦代表寶蓮寺參與好多社區活動，有離島區社團領袖形容宏通係釋智慧左右手，由佢接任順理成章。宏通噚日表現低調，據稱除咗處理寺務，佢亦有主講佛學講座，喺本地佛教團體中頗有名望。
宏通上位似看高一線，不過另一熱門健釗法師亦好猛料。健釗係澳門人，63年到寶蓮寺依第二任住持筏可法師受戒，住錫香港近30年，94年先返澳門任菩提禪院住持。佢又係香港佛教聯合會會長釋覺光弟子，後台實力雄厚。
有佛教團體人士稱，健釗近年同國家宗教局官員交往密切，經常到國內宏法，同香港宗教界亦好多接觸，交際手腕圓滑，香港佛教界到澳門交流，健釗會親自揸車接送遊覽兼送手信。雖然佢家住錫澳門，其實仍有過問寶蓮寺事務，02年「封山」事件佢係禪寺發言人。
輩份年齡各有優勢
八方求教得道高人，究竟宏通、健釗邊個有機會爭贏？高人話健釗輩份高於宏通，有優勢，然而年逾六十，稍輸蝕。呢幾句佛偈，八方自問冇慧根，參唔透。寶蓮寺擴建工程2010年竣工，預計參拜善信大增，寺方仲想收入場費，面對巨額香油錢，真係要搵個有大智慧高僧先管得掂。不過寶蓮寺住持選舉仲小圈子過特首選舉，由董事會內十幾位法師說了算，其他人只可食齋拜神，冇得投票揀人。