美食節09200隻鮑魚仔2分鐘派清

美食節09
200隻鮑魚仔2分鐘派清

美食節又開鑼，踏入第20屆，場面依然墟冚到不得了，首天未滿十點，已有過百人排隊等候入場，個個有備而來，一出閘即搶攻各抵食攤位，一百份$1肉丸瞬間就賣清，唔想執輸，就要睇吓各人有咩搵食心得。

記者︰黃家欣、王震遠
攝影︰伍慶泉、王文忠
模特兒︰Sansu&Algie@PureModels

試食大大件冬菇
攤位︰1D17-15

最早入場的一批，明顯做足功課，甫入場已自動埋位，除$1一百粒肉丸之外，最多人「圍」的必定是安記的攤位。事先張揚每日預備400隻鮑魚供試食，原隻即食鮑魚仔，每隻有拇指般長，配周中師傅調配的醬汁入味又好食，質地爽滑彈牙，不少人試完即買。即食鮑魚做法相當方便，只要整包翻熱即可吃。除鮑魚之外，安記還有大量冬菇試食，冬菇肥大肉厚，負責人輝哥特別將冬菇切得大大件來試食，「最緊要俾人試真個味，真係不惜工本﹗」大啖試食策略相當成功，現場所見不少媽媽級食客，試完都讚好，更大手入貨，第一輪二百隻鮑魚仔，2分鐘派清。

■切得大大粒的冬菇不停供人試食。

■中國花菇$29.9/半斤，味道香甜濃郁。

■安記負責人輝哥不惜工本，都要讓人試真他們的鮑魚。

■安記不停搞試食，攤位長期積聚大批人客。

■即食鮑魚原價$368，會場內特價$288，有八折，好多人搶住買。

買$100烏冬送$200雪糕
攤位︰1D17-12

沒有做準備功課亦不緊要，只要記住一個策略︰有人群聚集的地方，必有着數。峰一是其中人流極旺攤位之一，原來買滿$100烏冬，即送價值$200的雪糕福袋，內有士多啤梨雪巴、雪糕巴芙及峰雪糕等，全部由日本空運，雪糕口感軟滑，奶味十足。而即食烏冬更有札幌麪豉、天婦羅以及XO醬特多款口味，一打開發現配料甚為豐富，有餃子、肉丸、腐皮等，碗底更有凝固成啫喱狀的湯底，遇熱即溶，毋須額外加水，方便到極，烏冬質地爽滑，湯底帶一陣清甜，竟然比煮即食麪更為方便、美味。

■即食烏冬每盒$20，$55/3盒，買滿$100即送價值$200的日本雪糕福袋。

■即食烏冬內的配料相當豐富，有餃子、肉丸等，碗底更有湯底。

■福袋內有多達9款日本雪糕，值回票價。

■即食烏冬還有札幌、天婦羅及XO醬等多種口味。

淮揚熟食
攤位︰1C15-01

本港的活肉代理商五豐行，除了供應由內地送來的鮮肉外，亦有以五豐品牌所推出的熟肉製品。這次參展美食博覽，會場內除了設有即煎牛肉試食攤位外，亦提供獅子頭、蒸鮮肉包等，還特別請來自揚州的師傅到場，在顧客面前即製獅子頭給顧客試味。熟食製品以淮揚菜式作主打，獅子頭、東坡肉等等，只須用水煮或用微波爐加熱即可食用，非常方便。