肥佬黎發咗好耐嘅電子媒體夢，好快可以達成。壹傳媒集團已經向台灣嘅國家通訊傳播委員會（NationalCommunicationsCommission）正式申請衞星廣播電視事業執照，仲一口氣申請壹電視新聞台、資訊綜合台、娛樂台、電影台、運動台五張頻道執照，預計明年可以喺中華電信MOD（MultimediaOnDemand,多媒體隨選視訊）開台。
以動畫還原新聞現場
來自台灣《蘋果》嘅消息話，壹傳媒電視頻道其中一樣撒手鐧，就係以高品質動畫輔助新聞報道，亦會保留壹傳媒報道有錯必改嘅傳統，每日播出自我更正同埋觀眾批評時段，仲話會搞個甚麼倫理委員會。
壹傳媒集團行政總裁朱華煦解釋，動畫技術用於還原新聞事件同解釋科技新知，可以輔助影像不足，喺外國頗受好評，壹電視會專業、謹慎咁報道新聞，以新聞影片同現場報道為主，若現場拍攝困難、難以取得影像，為咗完整還原先會以動畫輔助，絕非「動畫新聞台」。
朱總話，壹傳媒涉足電視，會緊守台灣傳播法規，延續集團政治立場中立、絕不為政黨服務的傳統，而且會製作更多戲劇節目，擴大本土劇同藝人發展空間。