長實新樓盤日出康城黐住將軍澳堆填區，以雙墳景聞名，附近環境有幾多可持續改善空間，大家心中有數。八方日日喺堆填區附近嘅壹傳媒大樓返工，長年俾臭氣籠罩，對於幾千個小業主嘅決定，只能寫個服字。長和系主席李嘉誠噚日喺中期業績記者會「賣樓讚樓香」，話堆填區環境令佢心曠神怡！
「堆填區個綠色真係靚」
日出康城一、二期首都同領都，非一般居住環境好多傳媒已廣泛報道，超人話平時好少巡地盤，日出康城係例外，「呢個地盤我啱啱去咗幾個鐘，我好少去嘅，我見到堆填區嗰邊，個綠色真係靚，心曠神怡！」佢更表示唔係隨便到此一遊，「我不止喺樓上睇，仲喺地下行。」
老竇讚堆填區環境心曠神怡，小超人照跟，「個地方空氣清新，個個開開心心，首都已經入伙咁多，唔會睇一份報紙嚟決定個盤好唔好。」小超人又話自己日日夜夜唔知去過幾多次日出康城，外界唱日出康城環境影響銷情，佢反駁：「唔好emotional講，好簡單一樣嘢，有1,700個家庭，乘以一家四口，買之前一定睇過晒。」
超人噚日又話《蘋果》「專登揀我哋嚟攻擊」，話雖然雙方冇生意來往，「但唔好樣樣揀着我哋嚟寫。」實情係環保署舊年收到近千個將軍澳堆填區臭味投訴，今年底喺將軍澳運動場舉行嘅東亞運動會，亦憂慮臭氣影響健兒表現。
臭味睇唔到，卻唔等於唔存在，超人可能有特異功能護身，身處勁臭堆填區都心曠神怡，一般人冇你咁富貴，抵受唔住臭氣侵襲，既然你哋覺得空氣清新，不如舉家搬嚟同八方做鄰居，大家開開心心，日日心曠神怡吖！
一周收59宗臭氣投訴
八方問過TVB視后佘詩曼，佢話平日喺將軍澳電視城都聞到臭味，「如果係回南天就特別臭，好在我哋成日喺室內做嘢。」滕麗名就話臭都要頂硬上，「始終電視城好近堆填區，所以難免有垃圾味。」藝員袁彌明話死都唔住堆填區附近，佢經常出入電視城，「特別係夏天，嗰啲垃圾味蒸晒出嚟，好似住喺垃圾房咁。」
住喺調景嶺維景灣畔嘅西貢區議員陳繼偉話，環保署單在7月底最後一個星期就收到59宗堆填區勁臭投訴，當中最少4宗係首都住客。八方相信日出康城全部入伙後，投訴數字肯定飆升，有網民建議樓盤索性改名「溢出骯城」。
mailto:[email protected]