讀者B來電郵講及七月尾嗰個星期從吉隆坡旅遊回港，日期與左丁山差不多。讀者B認同左丁山對吉隆坡之見解，佢碰到之的士司機，冇一個係華人，但個個開天索價，十分嚇人，直到最後一天，由居住的香格里拉酒店步行至雙子塔，發覺唔使十分鐘，於是醒悟的士司機劏客。
吉隆坡香格里拉與KLCC同在所謂吉隆坡金三角地區，相距不遠，其實所有主要市內知名酒店與商場，都在步行範圍之內，不過吉隆坡之行人路不易行，加上天氣熱，故此貪爽坐的士而已。讀者B講到：「回到香港，真有一種感恩的感覺，一個相對有規劃、公平、公正和交通完善的社會，香港人真幸福！」出外旅行，回港後往往有此感覺！記者G剛從印度回港，跟旅行團去過新德里、孟買、泰姬陵，就一樣話香港人真幸福！佢哋去到孟買，見到呢個南亞金融中心貧富懸殊，有最豪華嘅酒店，有十分恐怖嘅貧民區，給人一個非常詭異嘅印象。
小Y Y啱啱去完北京，帶外國學生遊長城、紫禁城與頤和園及現代化嘅鳥巢，印象如何呀？佢話多年不變。世界上好少有中國人咁，視古蹟為野餐地點，坐在古蹟範圍內大吃大喝、大聲講大聲笑，外國學生睇到話感覺好奇怪喎。
不過咁，人在香港，住得耐，就樣樣唔順眼，罵這罵那，罵得不亦樂乎，日日都可以搵個題目鬧餐飽。記得左丁山坐車離開吉隆坡之日，汽車去到機場，因機場由NormanFoster設計，與香港機場有七八分相似，只係貼近機場入口之一條通道有雪糕筒阻路，不准駛入。何故如此？司機破口大罵：「呢個機場外形似足你哋香港，但管理就完全唔似，你哋一流，我哋九流。呢條路最初係開嘅，但後來話要畀高官及國賓專用，搞特權吖嘛！」人哋啲高官係高人一等嘅，香港啲高官就未必。秘書V在星期五到鏞記吃晚飯，因四樓房間全部滿座，一家人坐在三樓，又俾佢見到曾特首一家人行入嚟，同樣坐在三樓一張大枱，滿堂食客冇特別反應，視特首為一個普通食客。行勻東南亞與內地，冇一間酒樓食肆夠膽話畀市長、市領導人聽：「冇房喎，坐散座啦」嘅啫，你話香港幾平等，如讀者B所講：「香港人真幸福！」