保安局局長李少光個仔李霖恩就快做老竇，佢太太方燕凌有咗8個月身孕，之前做過藝員嘅 李霖恩仲瞞住老婆幫佢報名參加最靚孕婦選舉，佢老婆真係犀利，艷壓群「媽」贏咗個全場亞軍返嚟。大前晚李霖恩同老婆喺銅鑼灣食完晚飯，仲手拖手散步當做運動，由銅鑼灣行人專用區行去銅鑼灣廣場，同行仲有一個女性友人。
大肚婆猛撐腰
見準媽咪個肚都幾大，但身形就唔見好腫，仍然靚靚唔論盡，佢着住件闊身花花T恤同牛仔褲，銅鑼灣行人專用區人多，見佢不時摸住個肚，又間唔中用手撐實條腰。佢哋一行三人慢慢行去銅鑼灣廣場，李霖恩同老婆先去停車場攞車，原來大前晚佢係揸老竇架Jeep仔，安頓好老婆同朋友後，再會合另外一個朋友，就開車走人。