近日陳奕迅（Eason）和謝安琪被傳搞婚外情，當中更有指是好友何韻詩四圍爆料，前晚Eason和阿詩齊齊上無綫《勁歌金曲》，兩人在記者面前以行動來闢謠，除了老友鬼鬼搭膊頭影合照，更異口同聲強調謠言不會影響兩人的友誼。
陳奕迅（Eason）、何韻詩（阿詩）、張惠妹、蕭敬騰與Mr.等前晚到將軍澳電視廣播城錄影《勁歌金曲》，Eason和Mr.更擔任節目的嘉賓主持，阿詩憑《舊約》奪得冠軍歌，而身為主持之一的Eason也與台灣天后張惠妹在台上合唱，令人聽出耳油。
近日Eason和謝安琪被傳搞婚外情，緋聞除了牽涉到兩對夫婦外，就連他們的好友也被扯上關係，當中阿詩更被指是金手指爆響口勁唱兩人的緋聞，前晚Eason和阿詩自傳聞後首度同台出現，不過兩人並未因傳聞而影響友誼，無論在台上或台下都表現得十分老友，除了在台上老友鬼鬼搭膊頭外，在後台更應記者要求合照。
鬼馬掩下體
不過當兩人甚有默契影合照時卻發生一段小插曲，事緣當兩人鬼馬地影相時，一名清潔工人撞到Eason，雖然只是輕微碰撞，但曾爆蛋蛋的Eason卻鬼馬地扮作痛苦遮掩下體，身旁的阿詩亦即時抵死作狀再碰撞他，引來哄堂大笑。
「我面皮咁厚」
事後兩人分別接受訪問，對於與Eason見面時會否覺得尷尬，阿詩即反問說：「你話我會唔會？我面皮咁厚，平時朋友講完嘅嘢我都唔記得，所以今次唔想多作評論，頭先佢路過都有問係唔係我唱先，我仲講笑話唔唱你仲唱邊個啫。」阿詩和Eason更異口同聲強調今次事件不會影響友誼，因為大家都清楚對方的性格。
阿詩更有感而發向記者坦言覺得拍劇較開心，因為拍劇時好像不太多是非，她更自爆早幾日有想喊的衝動，但就強調不關傳聞事，她說：「因為我嚟緊會淡出劇組，由於當初我拍《女王辦公室》時只預計拍攝60集，家我都係度時間出嚟補戲咋。」
此外，Eason坦言之前未試過聽阿妹唱live，所以綵排時已令他十分享受，他說：「真係未試過有歌手令我有呢個感覺，好懾人呢。」
採訪：卓寶花
攝影：陳順禎