韓國車廠KIA推出最新揭背車Soul，外形有啲似Sirion嘅圓潤，又有啲似bB嘅肌肉感，不過佢係部SUV。三不像？唔係，反而有種三合一嘅型格，有線條又具肌肉感嘅城市多用途車型，擺明係部可以好玩嘢、改裝空間超大嘅型仔車。首批登場只有十部，搶先擁有嘅理由——筍！
記者：梁美甜
攝影：陳陶鈞
Model：Alia@PureModels
內外玩色
KIA旗下全新車型Soul以概念車發展而來，外形方圓有致之外，唔少立體嘅車身線條令整體流露一股肌肉及層次感。第一眼見到Soul嘅感覺係，好玩嘢！點解？未見車之前已經收到介紹嘅書仔，書仔入面有張拉晒花嘅透明膠片，畀你可以放於車相之上模擬拉花後嘅靚樣，好玩！到睇真車，一樣有玩味，首先係大膽玩色，新車一推出已經備有多個顏色選擇，鮮紅、鮮橙、奶白、茶綠、海藍……只係怕你誇唔起。內裝一樣唔單調，可以玩襯色，鮮紅襯黑、白配紅等，就算基本配置都好，全黑絲絨內裝都來個鮮紅置物格，服未！好多潮人鍾意bB、Materia等車款，貪佢有型有格之外，更提供大量改裝空間，Soul都有呢個強項，即使加幾項Options，都已經即時型過人。
筍價十部
量產Soul本身有三款車型，包括1.6公升渦輪柴油引擎、1.6公升汽油引擎入門版及2.0公升汽油版。由於2.0版本原構思係於美國等用左軚嘅地方推出，故係左軚車型，所以暫時未有計劃引入香港！今次代理引入嘅係1.6公升汽油版本，五速棍波，馬力輸出124匹，扭力15.9kgm。數字唔算有睇頭，而且車身唔算細，心諗，坐滿人跑上高速實唔夠力啦！點知一發力，有點出乎意料，Feel到部車飆住去，而且似乎仲有大把力水未出盡！
香港嘅Soul絕對係矜貴版，唔係講車價而係話車量，事關車廠首批畀香港嘅配額只得十個，當中已經包括入門版同埋豪華版，多萬零蚊嘅豪華版就多個天窗、18吋胎軨、真皮方向盤及電摺側鏡，仲唔係畀少少就大豐收？要豪要型都只係十零萬，怪不得代理話明呢批係「筍盤」啦！
由概念開始……
Soul原概念車型首見於06年北美車展，相比之下發現，KIA由概念到量產嘅設計元素都原汁原味地保留。
披一身花色
擁有Soul，你可以有多多要求，外觀內在都可以玩花臣，加個咁型嘅拉花，更野性，盛惠$2,000起。
展望變電能
Soul當然仲有發展空間，概念車KIAEco-Soul舊年就已經喺巴黎車展出現，合乎環保潮流嘅全電能，令人期待！
規格
引擎：1.6LDOHCCVVT
馬力：124ps/6,300rpm
扭力：15.9kgm/4,200rpm
傳動：五前速手波
售價：$139,800（豪華版）/$129,800（直版）
查詢：KIAHK（28932326）
