日前，筆者舊愛之一，騰訊控股（700）公佈了半年業績，之前市場普遍預期其半年利潤升幅應介乎6至8成之間，結果不負眾望，騰訊上半年比去年同期多賺近9成，優於市場預期。
對於愛股業績有好表現，筆者當然高興，過去半年，除了新能源板塊，騰訊都係焦點股，成了大藍籌之餘，還不斷創新高，市場對騰訊早已投下信任票，不少讀者有疑問，騰訊業績比樂觀預期更好一點，點解仲要出貨？
的確，我們都看好騰訊業績，但該股由年初至今已升近3倍，就算業績爆燈，始終會畏高，今次業績出乎意料咁好，當然冇問題，但業績前高位119.60元，亮麗業績後最高只見122.70元，收市得118元，僅僅保住陽燭而已，若果業績只有預期下限或更差，就算未來仍然係看好，怕且都有不少回調空間。
騰訊現價不吸引
筆者估如果未來大市氣氛唔差的話，騰訊見130元應不是問題，甚至再多加泡沫成份，150元亦有機會到達，不過，在118元水平博股價升上130至150元，值博率不是太吸引。
話說回來，騰訊作為行業龍頭股，基數較大，很難一直維持近倍增長，尤其在網遊行業，一隻遊戲暢銷，唔代表下一隻同樣受歡迎，高估值難以得到保證，反而同業金山軟件（3888），基數及估值較低之餘，又能因騰訊業績而得到追捧，以昨天業績後首個交易日來說，金山軟件就跑贏騰訊。筆者早前叫換馬亦係此原因，不過士佳轉馬之後只係一直持有，未有加注。
至於上次提及過的網龍（777），成為iPhone軟件營運商的傳聞被否認，表現差少少，但卻不致於大跌，筆者反而認為唔太差，其實最近科技及網絡相關股表現都不俗，例如阿里巴巴（1688）等，當中有部份只係短炒，及不上金山軟件咁好，可炒可揸，但卻反映此板塊表現強勁，應值得投資者繼續留意。
最後講大市，昨日一如所料，筆者係估唔中大市走勢，前天十個九個看得較淡，士佳都估會向20200進發，但大市又反彈，執筆之時美股期貨表現不俗，上冲下洗，反映大市依然未有明顯方向，筆者唔修改前日看法，暫時依然係較反覆，大方向就仍然係吼低買貨為上。
張士佳
華富嘉洛證券投資服務部董事