人生有幾多個十年？房屋署副署長劉啟雄做埋今日，就要離開工作咗41年嘅房署，佢同記者茶敍撫今追昔，強調做足幾十年，係時候休息吓，所以唔會學前老細梁展文，退休後唔會幫私人公司打工。
劉啟雄多年嚟立下不少汗馬功勞，最難忘係清拆鑽石山、調景嶺寮屋區，事關涉及居民數以萬計，所以要成日開居民會傾安置同賠償，經常通宵達旦。此外，佢亦係房署「樓王」，歷年賣出40萬個居屋、公屋單位，批出至少3萬宗置業貸款，見證好多港人由冇殼蝸牛變成業主。80年代港府大規模興建公屋，劉啟雄做過愛民邨房屋事務經理，佢日前重遊愛民邨，一班舊街坊仲盛裝迎接，恭喜佢榮休。