長和業績會上，李超人又再發表偉論，佢話一個人能輕鬆炒股賺錢，就唔會勤力工作。
呢一句恕星俠完全唔同意，識炒股之人一定知道炒股唔一定會贏，佢哋炒股之餘，都要返工及搞搞實業，所以識炒股之人可能比一般人仲勤力至真。
大摩MSCI中國指數加入幾隻成股份，唔少散戶都趁機炒作。不過，好似同係煤炭股，昨日買福山能源（639）梗係比炒恒鼎實業（1393）為好，前者升5.1%，收5.70元，後者受業績倒退影響，股價下跌5.6%，收7.97元。
呢個現象反映兩股雖一同納入大摩MSCI中國指數，但唔代表股價會同樣炒上。
候50日線買第一注
恒鼎下跌，主要受中期業績下跌影響，該股半年純利1.18億元人民幣，下跌78%。股價昨以大陰燭下挫，成交急增，反映沽壓沉重。
技術上，恒鼎已失守20日線支持，料要回補7月中的上升裂口7.45元，後市調整應未完，可待跌至50日線（現處7.13元）企穩，才買第一注。
方星俠