昨日藍燈籠系業績未出，有好心報章統計長和公佈業績當日，股市升多跌少，從而得出「港股73%升」結論。的確，自2000年至今嘅19次業績公佈日，股市有14次都係開「大」，配合埋昨日大市真係出現報復式大反彈，唔難令人有錯覺，認為大市表現同某系公司業績期有不謀而合之處。
讓我們用一個活生生的例子作比喻︰入賭場玩大細，假設我參與19次，有14次開大，以咁嘅邏輯推論，開大嘅可能性都係73%。大家都知現實唔會咁簡單，買大細唔單止係50%開大同50%細，仲有圍骰──大小通吃。其實呢類猜開大細嘅估市方法，喺未有金融海嘯嘅旺市時，投資大行一直都有用，有間仲出晒名以流年生肖測市。
《黑天鵝》作者Taleb話，世事無奇不有，宇宙萬物運行皆有定律，但仍離不開隨機性（Randomness）。測中固然可能係獨具慧眼，亦可能純係撞彩。一般情況下，猜對嘅人總相信係自己眼光好，猜錯就認為係「天無眼」。
睇圖測市易墮陷阱
自由市場的股市，每日都受千萬種因素影響，唔單止係大家日日開電視聽到嘅資金流向、技術走勢、政策、市場情緒等，仲有大家意想不到嘅突發事情。試問當年又有誰想到天降大鳥直撞世貿雙子樓？而呢啲種種因素亦互為影響，所以任何人話可以有方法，甚至相信高盛套秘密程式可百發百中，可能係太天真太儍。學李超人話齋：「若能輕鬆炒股賺錢，咁相信每個人都不會勤力工作。」
統計要準，都要SampleSize夠大，睇番幾千年人類文明入面，股市歷史相對係何其短，所以即使多次發生嘅走勢，甚至係大自然嘅常態（如黃金比率），可能終有一天會被否定，因為係巧合又好，的確準都好，都無從印證。金融海嘯嘅發生，已令經濟學界起咗唔少波瀾，問到底一直用緊嘅經濟學理論，係咪出咗問題，更何況係近代之技術分析？
雖然盡信圖不如無圖，不過在未有必勝秘笈前，圖表分析仍係主流方法睇市，但要記住永冇話100%「包生仔」。大戶莊家深明散戶愛睇圖，各種技術陷阱亦應運而生──當大家最怕跌穿平均線，就梗係跌穿震走你；大家睇大成交破頂，以為實有得執，結果原來係最後接火棒。喺金魚缸出生入死咁耐嘅你，識執生未？
胡孟青