「畀張支票你，銀碼任你填！」呢啲電視劇橋段，通常都係超級有錢佬，想買件無價珍品，或者想「包起」清高嘅靚女明星，先至用呢啲以本傷人手法。勢估唔到曼城為咗打動美斯「芳心」，亦都向巴塞隆拿送上冇銀碼支票。
出28億巴塞必放人
曼城得到蒙蘇呢個中東大水喉放水，今年暑假巴利、艾迪巴約、泰維斯逐個加盟，不過之前簽唔到卡卡，始終令蒙蘇耿耿於懷，要成為歐洲班霸，點都要有1、2個頂級球星看吓門口，曼城就睇準巴塞家同美斯傾緊續約，就乘虛而入。
據西班牙《馬卡報》報道，曼城呢次真係志在必得，不惜用任何代價，只要巴塞肯開個價就得。西班牙就有買斷條款，即係只要其他球會出到買斷價，擁有美斯嘅巴塞，就唔可以拒絕對方收購；之前皇馬就試過用呢條橋，從巴塞撬走費高。家美斯嘅買斷價係1.5億歐元（約16億港元），就算續約成功，買斷價加到2.55億歐元（約28億港元），蒙蘇絕對畀得起，就算加到3億歐元，對呢位油王嚟講都係濕濕碎。
美斯念舊企硬唔走
不過富可敵國嘅曼城面對嘅最大難關，係冇辦法打動美斯嘅心。之前曼城想收購呢位22歲前鋒，出到1,200萬歐元除稅後年薪，美斯都不為所動。梗係啦，呢位阿根廷國腳係巴塞青訓出身，球會又幫佢醫好「侏儒症」，直頭恩重如山；而且美斯上季幫巴塞贏得3料冠軍，今年世界足球先生相信亦十拿九穩；睇怕曼城唔單止要出高薪，仲要用埋攻心計，先可以打動美斯。
其實球壇都有好多好似美斯咁忠心嘅球員，好似車路士隊長泰利，就拒絕曼城高達2,800萬鎊（3.5億港元）嘅高薪合約，願意留效車路士。泰利更直接同車仔行政總裁簡安講：「我受寵若驚，不過我絕不想離開。」