令的士乘客唔老利嘅情況多的是，車櫳異味都係其中一項。黃師傅識啲行家唔鍾意着凉鞋，但慣咗排隊等客時除鞋鬆一鬆，唔知自己「人氣高」又唔用愛膚堅，搞到全車陣陣異味，個客一上車全部受晒，真陰功。好彩新一代的士司機，已經無啲咁麻甩嘅行為，但普遍仍有大量煙民，一無客悶悶哋就點煙，就算開晒窗吹生風，其實都好難辟走陣煙味。黃師傅試過有個靚女客上車，由時代廣場去富榮花園，咁大支旗梗開心，原來靚女本來搭前面架的士，點知上車一陣煙除，即時落車，咁就益咗我。唔好話食煙影響健康同生意，其實仲觸犯埋《吸煙（公眾衞生）條例》（第371章）第4條，有無客都唔可以點煙，食完隨手掉煙頭又衰多條垃圾蟲，幾無謂呢，戒咗佢啦。
文：黃師傅