今時今日仲講o靚模就真係有點out，但你咪理，每次出C1不論男女老幼都係成版睇到一乾二淨。遠在倫敦、兵工廠領隊雲格一樣都係o靚字掛帥，皆因佢喜歡用o靚仔。一個韋舒亞，一定睇到兵工廠球迷好高興，又射爆格流又贏MVP，最近就連卡比路都話留意佢，仲要係上屆聯賽盃已經開始實佢！隨時下年帶佢去南非。剛剛韋舒亞就更加入選埋英格蘭U21，好不威風。
簽前鋒唔好再拖
兵工廠這類o靚仔兵，真係好多，多到又外借又放入雪櫃，不過機會又有幾多？聯賽盃畀你入3球又如何？根本冇機會踢真正英超。雲格，給他們多幾個機會啦！
o靚模都分潮模、胸模、模Art一大堆，但又有多少可登大雅？兵工廠班o靚仔都一樣，禾確特比較走得近，不過都冇Angelababy的級數。請緊記，禾確特服「兵」役的時間已不短。o靚仔中，禾仔都算禾哥喇。
雲格近年未有花錢買大牌，今年放走艾迪巴約、高路托尼，以為會有響朵球星加盟，誰知呢一刻都只係得華美倫，上季中艾沙維的確振奮人心，半個月前嘅亨特拉爾傳到熱辣辣，點知一轉背新尹巴士頓真係飛埋去米蘭！又慢一步！到近日查馬克加盟新聞又係日傳夜傳，但到底最後交易又會否成事？又要加時先deal？
冇錢唔係罪，節儉更加係美德，不過冠軍就冇你份；愛之深責之切，雲格啊，你都唔想阿仙奴要踢甚麼歐霸盃啩？簽個偉大過周秀娜嘅前鋒返嚟啦唔該！
文：守丹