負責大搞國慶60周年嘅中總會長蔡冠深，噚日拉埋一班傳統親中商會宣佈成立籌委會，其中一名主席團成員係近日入咗醫院嘅賭王，佢抱恙在身，噚日自然嚟唔到。
啱啱喺大陸返港、自稱唔知賭王入廠嘅蔡會長話，早排中總為大搞國慶60周年，覺得公益金「百萬行」籌款都唔夠勁，決定下個月發起個「60周年國慶千萬行」，由維園行到去太古城附近，全程要行個半鐘頭，目標係籌到1,000萬元。佢坦言原本諗住噚日見到賭王，就即場向對方撲水，因為截至昨日為止，籌款數字好唔掂，只有三、四百萬元。
千萬行難成事
蔡會長大吐苦水，話呢個千萬行喺9月27日就舉行，佢已盡晒力發動屬下企業泵水，現時三、四百萬元中，有成百萬元係出自佢屬下企業，希望其他富商都幫幫手咁話。金融海嘯令本地富豪元氣大傷，難怪今年搞國慶人人口爽荷包，噚日到場嘅中聯辦副主任王志民卻未夠喉，猛叫商界去中西部投資發掘商機。老實講，如果中西部真係咁好景，商界又何需勞煩西環開口，仲唔一早搶住去掘金咩？