大熱天時住板間房嘅人最辛苦，運輸及房屋局局長鄭汝樺特別揀呢個時候去板間房體察民情，下屬為佢安排咗探訪四間，本來都已經同意晒，但其中一間突然反口，請樺姐食檸檬。原來業主怕佢係管公屋嘅局長，佢到訪講多兩講可能有人跟住去埋申請公屋，變相搶走租客。
樺姐終於都去咗三間，仲同住客傾偈，問佢哋點解唔申請公屋。多數住客都上咗年紀，有人話住咗十年八年，大家都熟晒，身體有乜唔妥，都有同屋幫手打九九九，有人更加話自己都唔擺得好耐，唔想霸住公屋單位。樺姐總結經驗，唔係話政府送間公屋出嚟，就一定人人都接受，皆因唔同人有唔同需要，對呢班板間房住客嚟講，「人情」仲緊要過間屋。