無綫劇集《烈火雄心3》今個星期六大結局，噚日成班演員到旺角造勢，點知一個宣傳，兩個主角分開做，屢傳不和嘅王喜同鄭嘉穎雖然坐喺同一架消防宣傳車到場，但係一頭一尾落車，落車後又各自分開。王喜一個箭步派佢自己印嘅宣傳單張，嘉穎就同黃宗澤招呼熱情粉絲。
暗示有人放料
有網友呼籲喺今次嘅宣傳活動反嘉穎，但現場未見有人反佢，嘉穎話：「其實我好想見識吓，網上咁多人，留言又唔使用真名，寫乜都冇責任。」
另外，嘉穎噚日接受商台訪問，承認王喜改對白，佢話：「佢通常唔會改對手嗰啲，接唔到我會同佢講。」但佢強調劇本其實一早出咗，如果有問題就應第一時間同監製反映囉。
問到係咪有演員臨場改劇本，嘉穎話：「呢啲實有，咁又未至於阻礙進度，因為都係改好晒先嚟。我入行16年，第一次俾人傳不和，我都覺得好奇怪。」似乎暗寸有人放料博宣傳。