恒生銀行（011）首位女副董事長兼行政總裁梁高美懿，正式上任只係過咗三個月，就急不及待以行動表明對恒生充滿信心。根據聯交所資料顯示，梁太分別喺上星期四同星期五，密密吸納恒生股份，合共1.2萬股，買入價分別為116.95蚊同埋115.3蚊，涉資139.35萬港銀。
涉資140萬
事有湊巧，上星期五恒生宣佈，執行董事兼副行政總裁潘仲賢因私人理由請辭。恒生今年高層人事變動確實唔少，首先係柯大班柯清輝退休，由梁太執掌帥印，其後陳國威又唔做財務主管，上星期潘生仲辭任添。
恒生企業管治紀錄一向良好，銀行運作着重團隊精神，管理層有變動應該都可以順利交接，但係市場總係多愁善感，梁太今次以真金白銀買恒生股份，可能想為市場打下一支強心針。不過，恒生昨日股價跌咗0.68個巴仙，收報116.4蚊，同梁太買入價差唔多，暫時對股價刺激作用唔係好大噃。