開學五大難 - 左丁山

開學五大難 - 左丁山

學生自願驗毒,本以為係閒事,點知講吓講吓,又似乎反對聲音甚大,扯到上人權、私隱、尊嚴、資源、教育等等,睇落會成為另一個政府大頭佛。曾特首當初親自掛帥,現在會唔會騎虎難下呢?反學生吸毒,最初由律政司司長黃仁龍上陣,實際上喺學校做驗毒工夫,係教育局範圍,睇吓副局長陳維安自己上電台與中學生對話,就知道教育局再次孭起重擔。
驗毒容易,驗出學生吸毒,如何跟進輔導,就需要長期人手,學校社工,一時之間,唔知邊處去搵。計起嚟,今年九月開學,教育局與學校面對五大難關:(一)三三四學制之高中一年班開學兼課程大改,係香港教育界之世紀大事,不容有失;(二)孫局長大力推行教學語言微調政策,各學校下有對策,亦係一件大事;(三)甲型流感揮之不去,倘若爆發,學校停課復課,帶來好大困擾;(四)來一單校園驗毒,學校老師、學生、社工以至家長必定疲於奔命,破壞教學與學習氣氛;(五)不久前,陳副局長仲猛話要教科書分拆,即將課本與教材分開,逼出版商降低書價。但如此一來,學校老師必為教材煩惱,如果學校要教師編寫教材,怎麼辦?你估寫教材係爬格子乎!
左丁山諗到上述五大開學難題,假如你係孫局長,如何解決,係唔係全部要在九月開始一次過一齊推動?既然第一第二兩項係頭等大事,第三項甲型流感算係突發性事件,學生健康要緊,第四項係曾特首拍板要做嘅,唔上馬唔得,第五項麻煩老師之事,不如拖得就拖啦,等啲學校老師唞吓氣先,遲一兩年至搞,分段試點嚟搞,老師仲歡迎㖭。做事有緩急之分,有政治優先次序,冇理由在全個教育界俾第一、第二、第四項搞到人仰馬翻之際,陳副局長竟然強推第五項也。

西方國家中學生吸毒之風,早有所聞,香港中學生吸毒是否猖獗,似無數據顯示,究竟有冇十分一學生吸毒呀?吸毒生之中,係偶一為之,貪過癮,還是已有重要比例學生成為「道友」呀?如果當局當冇眼睇,置諸不理,現在鬧政府推行驗毒之人,會唔會調轉頭大駡政府無良呢?左丁山諗唔通,套用一句流行用語,請用數字說服我。