香港機場嚟咗位神秘客人，八方同事噚日喺機場影到一架美國軍機停咗喺控制塔附近嘅停機坪，從軍機暗灰色嘅機身同獨特外形估計，呢架應該係美軍C-17環球霸王運輸機。
美軍軍機嚟香港有乜軍事任務？所有政府部門對此封嘴，民航處只證實有一架美國非民航機喺機場降落，機管局就話無可奉告。美國駐港總領事館話慣常都有美國軍機嚟香港，至於所為何事不便透露。
據了解，美國軍機同美國軍艦一樣，不時因為唔同原因，例如中途補給等而要求訪港，由外交部直接審批，香港政府完全冇權過問。美軍C-17型運輸機由四引擎驅動，可連續飛行4,400公里，總載重量高達77,000公斤。