澳門鉅記已成手信巨子，看暑假大攻勢全版全版報紙廣告，分店多兼海報也多，過大海眼耳口鼻避也避不開它的氛圍功力。
那年李碧華在澳門拍《胭脂扣》，探班後走出清平直街，當年生意最旺咀香園依然排隊人眾，夜色搖動，街尾年輕靚仔鉅記老闆十分勤力，向途人送上新鮮熱辣杏仁餅仔讓羣眾試食……兼要求拍照留念。在此之前，肯定張國榮於拍戲工閒來過，見合照已貼小小店子牆上。
咀香園對面有一所牛奶甜品店，名字遺忘，那是我吃處男薑汁撞奶至今仍認為最佳的一間。如今店子易手掛上「鉅記」二字，魂夢牽掛薑撞奶永不再遇上。
鉅記勤力抵上位，那時幫襯不全因味道，感動是老闆仔的精神。
正常情況，過澳門或多或少跟工作扯上關係，甚少買手信；事實自己不太算手信人；對上一次買得最多是安達斯山區印加人的駱馬毛帽子，原來伊朗及也門也不過買了點甜餅與舊猶太人遺下的銀器。但見朋友過大海人人勢必買至兩手無半分空隙，杏仁餅自然必選動作，他們今天喜歡嘗夜呣街小小店子真香；果然鬆化真甘香，具備店小情真風味。送我氹仔官也街晃記老婆餅，初看嘀咕：「唔係嘛，老婆餅靚得過我哋老家元朗恆香或流浮山泰興？」投閒置散自己房間小廚房。某朝事急，隨便找兩塊餅仔充饑出門，見晃記小小老婆餅，好，即管試試，唔！煙煙韌韌好咬口，甜度輕且香，連追四個十分過癮；相信除了葡京脆寶腰果曲奇，晃記精緻好味老婆餅將會成為自己不常動作其中一項隨俗手信。事實，除了賭城，澳門也真是個手信城。