昨日講到有機會問鼎今年「最有前途新人獎」嘅福山能源（639），如何「醜女大翻身」，今日講吓本身入咗ICU成植物人嘅上市公司，如可靠「唧」，躋身散戶最愛。
潮流興擠壓，靚模一夾，龍友忘晒形；至於上市公司若然獲新股東「一唧再唧」，逐步注入優良資產，點會唔令股民笑逐顏開？講緊係股價急升嘅光滙石油（933），前身叫做先來國際，喺去年引入新股東，易容變作海上加油站，盈利即時急增超過兩倍，點只係借屍還魂，話佢係「點屍成金」亦唔過份。
先來95年上市，一度係基金愛股，佢係當時夢特嬌（Montagut）嘅香港代理，大家當年應該見過唔少出入夜場嘅大豪客，或者老細級人馬，都以佢哋嘅絲質反光POLO恤為榮，唔介意以貼身剪裁將豬腩肉示人。可惜先來上市冇耐，突然冇咗代理權，惟有自創「IXESSE」品牌，既然大家都冇乜聽過呢個牌子，下場好明顯係基金洗倉。
光滙注入加油業即起飛
自此先來就過住炒股炒樓嘅生活，亦過得唔差，現金水平超過6億元。市場一直等佢發圍，終於皇天不負有心人，去年中大股東薛光林通過連串資產轉換將先來變身，易名光滙石油，隨即將海上加油服務「唧」入上市公司。話晒目前海上供油仍係非常小眾生意，除咗佢哋只得4間包括中石化等國企有牌經營，難怪可以咁快喺半年內令公司起死回生，盈利大增兩倍至1.7億元。
目前海上加油係免徵稅，亦不受國內燃油進口配額限制，可以話完全唔受政策變化影響，國際航線嘅船隊亦樂意嚟「食飽飽」先再出海搵食。不過呢行都有隱憂，行內人話目前即使全國年銷售量超過200萬噸，有八成市場份額由中國船舶燃料公司獨佔，即使光滙喺鹽田港係獨家，又有倉儲、碼頭及船舶，業內競爭仍然激烈。
公司亦知道呢個死穴，盡量將業務多樣化。先同中石油（857）合作開發天然氣，最新打算喺大連搞個800萬立方米石油倉儲，投資額高近70億元。呢個部署好有戰略性，因為本身係全國政協委員嘅薛光林，早喺03年已呼籲喺深圳設立石油期貨交易所。中國是全球第二大原油進口國，47%要靠入口，無論實際定政治考慮，設立石油期貨平台事在必行，光滙食正呢條水，提供石油倉儲，點會唔水漲船高？
胡孟青