中環皇后大道中皇后戲院07年光榮結業，大業主陸海通有限公司將皇后戲院所在嘅陸海通大廈拆卸重建，新大廈預計2011年4月入伙，屆時大道中將面貌一新，不過八方相信好多老香港仍然記得當年皇后戲院風光日子。
借東華三院紅地毯
皇后當年係港督睇電影首映必然之選，有陸海通老臣子話畀八方知，雖然皇后戲院咁巴閉，不過陸海通老闆卻十分慳家，多年嚟都唔肯花錢買張紅地毯迎接貴賓，每次搞首映儀式，都係向東華三院借三捲紅地毯。講環保，陸海通堪稱香港先驅。
港督睇戲首選皇后，一來近港督府，二來貪皇后夠氣派。該老臣子指銅鑼灣利舞台冇咁就腳，娛樂戲院「未夠班」，而且皇后設施一流，全港率先引入椅背可挨後嘅座位，當年要成百蚊美金，即係約600蚊港紙一張，當時一張戲飛大約幾蚊雞，可以坐咁矜貴嘅座椅，抵到痹。
幾十年前六叔邵逸夫電影王國如日中天，新戲首映都指定揀皇后，因為新戲喺皇后上映會有西報報道，外國人都知道邵氏又有新戲上。老臣子又話，其實皇后招呼港督睇戲冇乜着數，因為警方要事先清場搜查，全院要整天休息冇得做生意，督爺睇戲時外面隨時有成百個警察巡邏。如果係慈善首映，戲飛會賣貴十倍籌款，不過一樣爆棚，事關好多士紳想做攝石人，博同港督影相。
皇后拆卸，陸海通30張戲院座椅連同其他放映器具捐贈電影資料館，而陸海通經營戲院，據講可能同其中一個股東鍾情電影有關，第一代皇后戲院更係由呢位股東親自設計。
台山同鄉合資經營
陸海通係老牌地產公司，多年前由一班台山同鄉合資，最初係幫喺金山打工嘅鄉里做滙款生意，收到錢後就派人送返台山鄉下。家陣陸海通喺香港持有多項物業收租，公司股東十分低調。
中環陸海通大廈重建可能象徵公司踏入新時代，新大廈高27層，以縮少地盤面積換取更多樓面面積，日後皇后大道中同戲院里行人路會闊咗，大廈旁個報紙檔要搬走，陸海通又計劃出資重鋪戲院里，裝上環保街燈，環保本色貫徹始終。
mailto:[email protected]