美國保險一哥AIG又招人話柄，今次外界矛頭直指前日先上任嘅新行政總裁本莫施（RobertBenmosche），佢俾人踢爆新官上任就去度假happy，打算嚟緊呢個月內飛去克羅地亞度假兩個禮拜。行政總裁張大班椅都未坐暖，佢就放假去玩，結果當然惹嚟外界唔少非議。
上任第二日就出事
本莫施呢次度假安排被批評係愚蠢決定，紐約主管招聘公司SeidenKrieger總裁塞登一矢中的話：「雖然咁做唔會影響公司財務狀況，但從公關角度睇，亦唔明智。」一間企業最講究嘅就係image，唔係點會花咁多錢請人做形象顧問，但如果連高層都唔顧公司形象，花幾千萬做廣告宣傳都係嘥氣啦。
其實，如果本莫施咁心急去度假，點解唔去完旅行先上任，咁咪唔會招人話柄囉，真難明？聽講今次本莫施去克羅地亞度假嘅別墅，位於亞得里亞海附近，係佢喺99年以100萬美金買入，前屋主係南斯拉夫皇帝嘅財務大臣。
AIG近幾年都算多事之秋，喺舊年金融海嘯下慘遭沒頂，欠落政府1825億美金，家陣本莫施係公司4年內第5位CEO，佢仲話係董事局千揀萬揀之下嘅智慧之選，之前做過大都會保險主席，但估唔到上任第二日就出事，認真黑仔。
李華華
mailto:[email protected]