武打影星洪金寶（三毛）原本喺浙江橫店幫劉德華主演嗰部新戲《狄仁傑之通天帝國》做動作指導，但噚日有消息話57歲嘅三毛上星期突然心口劇痛同呼吸困難，於是即刻返香港就醫，結果發現血管閉塞，上星期三喺九龍聖德肋撒醫院做通波仔手術，佢大仔洪天明仲帶埋女友周家蔚去醫院，為咗幫老竇冲喜仲會同女友結婚㖭。
太肥要戒口
噚日馮仁昭打電話畀三毛，佢原來已經做完手術出院，三毛中氣十足咁話：「連埋今次我做過3次通波仔，希望唔好再有第4次啦，醫生話我太肥食得太多，要戒口喎。」體重有成250磅嘅三毛話遲吓要覆診，但今日要返上海拍《葉問2》，馮仁昭問佢頂唔頂得住時，佢就話：「頂得住，多謝大家關心。」講到天明係咪同女友結婚冲喜，三毛冇咁好氣話：「佢得個講，我得個等。」睇嚟三毛都好恨飲呢杯新抱茶喎！
之後馮仁昭打電話畀天明，問到佢係咪結婚幫老竇冲喜，點知佢九唔搭八咁話：「我19歲開始打算結婚，好失敗，冇人肯嫁。我好多女朋友，呢啲順其自然啦。」