今季英超仲有4日先開波，熱刺就率先做咗「冧巴溫」。咪誤會，熱刺唔係贏咗英超，佢哋班男人亦冇咁叻；攞第一嘅，係班球員嘅老婆及女友（WAGs）。
時尚雜誌《ZOO》早排搞咗個選舉，選今季英超邊隊波嘅WAGs最索，結果倫敦球會威晒；三甲分別係熱刺、阿仙奴同車路士，韋斯咸就第9，至於曼聯同利物浦就排4、5。其實，Big4唔係冇正斗WAGs，好似車仔後衞艾殊利高爾個歌星老婆雪露（CherylTweedy）就好正啦，只係冇熱刺咁多正嘢啫！
熱刺被封為英超最索WAGs球會，絕對實至名歸。睇睇佢哋班WAGs，好似啱啱由樸茨茅夫加盟嘅高治，佢未婚妻艾比（AbbeyClancy）就係英國著名內衣模特兒；而中場奧哈拉嘅前英國小姐女友丹妮莉（DanielleLloyd），如果撇開佢有愛滋嘅傳聞，仲係熱刺WAGs中最正一個㖭！
羅比堅尼老婆唔嘢小
至於隊長羅比堅尼老婆歌甸（ClaudinePalmer）來頭亦唔嘢小，除咗係模特兒，亦選過愛爾蘭小姐。先排佢仲喺產子完幾個禮拜後極速收身，着三點式狂騷勁爆身材。羅比堅尼前線拍檔之一迪科爾，係英超出名嘅花花公子，女無數，家拍緊拖嘅伊莫珍（ImogenThomas）亦係超正。
《ZOO》發言人麥索尼話：「熱刺WAGs嘅質素原本已經好高，家陣仲有埋高治嘅另一半，真係冇球會夠佢哋鬥！」
話晒倫敦係英國最繁華嘅城市，喺呢度生活嘅女仔，點都會比曼徹斯特或者利物浦生活嘅注重打扮。若然班WAGs本身有咁上下條件，加埋用啲靚衫同化妝品執一執，點可能唔靚爆鏡吖！所以亦解釋到點解倫敦球會會包辦呢條三重彩。熱刺班WAGs咁醒，我求大俠但願佢哋嘅另一半，喺球場上都可以好似班女人咁威啦！