副局長同政助舊年誕生以嚟，一向都由政務官出身嘅譚志源做「班長」，代表一班政治新丁發言，但Raymond做唔夠一年就另有高就，接替陳德霖做特首辦主任，升呢做咗煲呔身邊最新紅人，不過Raymond無忘本，表明以後仍然會繼續搵番呢班戰友吹水食飯，在公在私都有需要保持聯絡。
譚志源忽然癡肥
不過好明顯佢唔可以再做佢哋嘅發言人，所以稍後同佢哋見面時，會建議以一人一票方式重新選過「班長」，Raymond冇透露心水接班人係邊位，但睇勻成班人，八方覺得最有可能跑出嘅應該係梁卓偉，佢喺豬流感一役中表現淡定，公眾受落，相信最有資格接棒，只怕佢太忙冇時間啫。
而Raymond最近接觸得最多嘅副局係陳維安，事關煲呔瞓身打禁毒硬仗，身為教育局副局長嘅陳維安就成為Raymond最佳拍檔。
Raymond返新工後好似收咗身，佢話早前身體檢查，醫生竟然指佢癡肥，要佢勁減15磅，佢自問冇中年發福，忽然癡肥真係一頭霧水，但都係聽話減咗六磅。