賓架Ｐ看報，見有人介紹內地新書《領導要論》，於是搵人去買，但本地書局不見有此書，於是致電內地分行，請經理買幾本返嚟。書到之後，送左丁山一本，連忙翻閱，發覺此書確實合乎國情，凡北望神州、到內地打工，或派駐內地與各級官員打交道者，不妨抱住知己知彼之心，買來一讀，起碼知道吓內地官員、官場嗰一套正面工夫，對如何做官、如何博升職等等，多啲了解。至於負面枱底嗰套，聲色犬馬、識做費等等，暫時當唔知啦、扮吓懵先。
年青行政人員，睇管理宜着重正面，信吓書先，雖然孟子曰：「盡信書，則不如無書，吾於《武成》，取二三策而已矣。」（〈盡心章句下〉），我哋讀《領導要論》，從正面睇，係一本有系統、有組織之現代中國共產黨幹部領導訓練專書，無怪一啲國企，據講大量買入，發放畀高層行政人員學習。
要話升做公司CEO呀，有排捱，大學畢業後二十五至三十年做到CEO，已經好及格，例如鄭海泉與梁高美懿。未做到之前，當然係做阿二阿三、阿四，或者有大股東大老闆在，永遠做阿二。阿二即係副職，《領導要論》第五論講「履職能力」就講及「副職要處理好的關係」，綜合嚟講，有（一）到位不越位，要取得一把手的支持，不能隨意越位表態；（二）補台不拆台，要幫一把手遮風擋雨，決不能抽手旁觀，更不能落井下石；（三）有功不爭功，不能自視過高，喧賓奪主；（四）辛苦不訴苦；（五）諍言不失言（向正職阿一）表達意見，不能態度生硬，得理不饒人；（六）有為不胡為，不可仗着阿一的稱贊與信任，胡作非為，貪污腐敗；（七）聯動不盲動，與其他部門副職既有合作，又有競爭（上位），要理解彼此分歧，不能各自為政。
左丁山對上述七點，全部熟悉，思前想後，過往做過幾次副職，居一人之下，上述七項之中，對第四項第五項確係有時違反咗，即使其他五點做到十足十，已構成死罪，點會做到CEO吖！呢七項並非老生常談，行政人員想上位，必須記緊。此書第十二論，論表達能力，講到有不同的說話，例如漂亮官話，嚴謹套話，正確廢話，違心假話，有話實說，有話正面說，有話好好說，不該說時不說，不該說的不說，與有話直說。如何觀察與講出邊一種說話，大有學問，有志者不妨長期研究。