私隱專員吳斌前日黃昏去信教育局長孫公，提醒政府推行校本驗毒計劃時要保障學生私隱，吳斌忽然出招，政府措手不及搞到噚日凌晨先出新聞稿回應，反應仲慢過左報，《大公報》即晚已寫好題為〈父母保護子女竟是「侵犯私隱」？〉嘅社評，媽叉吳斌「助紂為虐」。
專員盡責提醒政府，卻遭左報聲討條氣梗係頂住，佢噚日同傳媒飯局時特別帶埋篇社論剪報到場逐點反駁，左報批評私隱專員向驗毒計劃「潑冷水」，「令政府吃了大大一記悶棍」，吳斌話自己只係出於關心，無潑水、耍棍。社論質疑專員唔預先提出意見，吳斌就話政府一直冇問佢意見，佢要自己上網搵資料先發現計劃原來咁多漏洞。喉舌傳媒有責保皇，但唔使做埋幫兇啩。