現今世代，想發達賺大錢，我估有兩條路都幾十拿九穩，第一係打細路仔主意，個個金叵羅，父母無吝嗇。第二固然係打寵物主意，唔少人當寵物係仔女咁湊。唔信？喺香港為狗換車嘅人大把，香港偏偏唔多以方便照顧寵物為賣點嘅車，咁點樣先係一部稱職嘅狗狗車呢？資深狗主阿南就推介ToyotaSpacio同HondaSpike。
記者：許維雅
攝影：陳盛臣
鳴謝：二手價查詢-大昌行易手車（22621118）
Spike高車身加大平台
要阿南揀至佳狗狗車，佢就肯定係HondaSpike。「1.5公升，牌費無咁貴。Spike車廂空間超大，車身設計更適合狗狗乘搭。」梗係啦，屬於方匣子車型嘅Spike出晒名內櫳夠晒闊落，拉開尾門，出入口超巨，地台低，百厭狗跳上跳落都好輕鬆。內櫳仲掂，兩側係塑膠料為主，容易清潔，唔少得係拉低後排座椅變出平台位，Spike嘅平台又大又闊，最重要係座椅同尾廂之間有遮掩罅隙嘅膠板。做阿南嘅狗狗咁幸福，因為主人不甘佢哋受歧視。「香港人比較鍾意名種狗，唐狗喺佢哋心目中又惡又會咬人，帶佢哋出街會成日遇到啲人無理取鬧，其實佢哋又忠心又乖。」愛犬聽話自然寵愛有加，所以佢哋堅持每個星期日帶佢哋上山下水，但「啲的士佬見到我三隻狗就唔停車；Call寵物雜誌入面介紹嗰啲Van仔，啲司機都畀說話我聽。」惟有為狗狗出部車。
HondaSpike規格
引擎：1,496cc直四
馬力：110ps/5,800rpm
扭力：14.6kgm/4,800rpm
傳動：無段變速CVT自動波
參考二手價：約$90,000（03車）
Spacio膠板 掩罅最重要
阿南同Iris呢三隻唐狗實在好威，有一部夠晒舒服嘅Spike都未夠，原來仲有架ToyotaSpacio輪流坐，阿南話，兩部車，人狗唔使爭。其實Spacio內櫳唔算好大，不過三隻大狗上晒車都好鬆動，座椅收摺靈活，一樣有膠板遮掩罅隙，狗狗坐車都安全啲。對Iris嚟講，仲有一大理由，「我係揸車新手，平平哋買架里數多嘅二手車最好，架Spacio都係二萬蚊左右，抵玩，唯一唔好處就係1.6公升引擎，牌費較貴。」咁狗狗去玩會鍾意坐邊架呢？有得玩，狗狗就坐邊架都咁開心，不過如果坐人，就梗係有三排位嘅Spacio取勝啦！
ToyotaSpacio規格
引擎：1,600cc列式四汽缸DOHC
馬力：100ps/6,000rpm
扭力：14.4kgm/4,800rpm
傳動：四前速電子波箱
參考二手價：約$17,000（99車）
人狗出車醒目貼士
自己有車載狗狗周圍去固然又開心又便利，但清潔同狗味又係頭痛問題，等阿南過你兩招啦。
開定冷氣減臭
其實啲狗令到架車臭，大部份原因都係因為興奮或者太熱流好多口水，所以一定要喺佢哋未上車前開定冷氣，等佢哋上車時可以盡快降低體溫。當然都要勤啲殺菌消毒洗冷氣。
地毯加膠墊
鋪上一塊大嘅厚身地毯再加膠墊，地毯夠厚，佢哋會企得穩啲，唔會咁容易受傷，面頭防水膠，一污糟可以即刻用濕紙巾抹，乾淨企理好多。
最期待寵物車
我覺得愛狗嘅人最期待嘅，應該係呢架香港仲未有嘅HondaElement，因為呢部車配備咗寵物專用的配件，好似車廂後安裝了印有小狗圖案的寵物床、防漏水碗、橡膠地板墊，仲有寵物管制系統安裝在第二排和後方貨物區，以及一個可伸縮的坡道方便寵物上落，而12V的直流風扇能讓寵物保持凉爽。嘆到暈，係寵物咋！可惜代理回覆暫時唔會有，大家只好打水貨舖主意。
http://automobiles.honda.com/element/
其他冧狗車款
ToyotaSienta闊落熱選
另一Kcar熱選，賣點同樣係內櫳空間夠晒闊，雙趟門，後座摺埋有平台位，而且多鮮艷顏色。受歡迎二手供應就唔少。
參考二手價：約$140,000（06車）
HondaStepwgn大家族坐得落
八座位嘅HondaStepwgn車廂又高又長，收起中、後排變成特大平台，五、六隻狗都放得落，08年先轉新款，二手貨都新淨得多。
參考二手價：約$180,900（08車2.0L）
LandRoverDefender主人都要型
越野四驅車嘅戶外形象素來都係載狗車嘅另一首選，香港有好多型男鍾意LandRoverDefender，車身高，尾廂夠晒大，紮紮跳污糟狗更符合LandRover夠Raw嘅形象。
售價：約$450,000
